Meghawarna|මේඝවර්ණ

වන්නියලැත්තන් ගේ පිකටිං පොජ්ජ

2012-02-27T08:48:00.000-08:00

බඩු මිල නගින කොට කෙළිනා පච පොජ්ජ

පච පොජ්ජෙන් මුං අඹරන ගුලි පොජ්ජ

මහම වනන්තර පොජ්ජේ කැකුළන්ට

හූරෝ කැවිලිලන්නේ මේ ගුලි පොජ්ජ

අඟර නැටුම් නටාපෝ

ඩිංගිරි නැටුම් නටාපෝ

ආටී බිටි ගසාපෝ

බලී බිලී ගසාපෝ

සුදු හුරට කෙළින්ඩයි

අපි දුවගෙන ආවේ මෝ

කොළඹ රාජව දකින්ඩයි

අපි දුවගෙන ආවේ මෝ

වැදි ජන ගී දෙකක් ඇසුරෙනි.

http://www.gossiplankanews.com/2012/02/vedda-protest-against-un.html

ශ්‍රී ලංකා ක්‍රිකට් කණ්ඩායම මිනී මරයි..!

2012-02-17T22:56:00.000-08:00

දිගින් දිගටම වූ පරාජ හමුවේ සියලු ලාංකික ක්‍රිකට් ප්‍රේක්ෂකයෝ ක්‍රිකට් ක්‍රීඩාවෙන් ඈත් වූහ. ඒ නිසා මහජනතාව සිහියෙන් සිටිද්දී තෙල් මිල ඇතුළු අනෙකුත් සියලු දේවල මිල ඉහළ දැමීමට ආණ්ඩුවට සිදු වූ අතර ඉන් කලකිරුණු මහජනතාව වීදි බැස උද්ඝෝෂණය කළහ.

ඉනික්බිති ඇති වූ ගැටුමෙන් එක් අයෙක් මරුමුව වැටිණ. මේ සියල්ලට මුල ශ්‍රී ලංකා ක්‍රිකට් කණඩායමේ දරුණු පසු බැසීම වන බැවින් මේ මිනී මැරුමට වගකිව යුත්තෝ ද ඔවුහු ය.

අත්වැරැද්දකින් හෝ ශ්‍රී ලංකා ක්‍රිකට් කණ්ඩායම තුන් කොන් තරගාවලියේ අවසන් මහා තරගයට සුදුසුකම් ලැබුවහොත් වතුර බිල, පාන් මිල සහ ක්ෂණික සිය දිවි නසා ගැනීමේ පානයක් වන කෘමිනාශක මිල ඉහළ යාමට නියමිත වුවත් කිසිවෙකු උද්ඝෝෂණ නොකරනු ඇති අතර කිසිවකු අකාල‍යේ මිය නොයනු ද ඇත.

(හිතවතකුගේ අදහසකි.අවසරය සහිතව පළ කරන ලදි)

බූමිතෙල් බෝතලයට මිනීමැරීම

2012-02-16T07:56:00.000-08:00

බඩ වියත රැක ගන්නට බූමිතෙල් බෝතලයක් ඉල්ලූ වරදට සන්නද්ධ තොපි විසින් මරා දමන ලද්දේ නිරායුධ අහිංසකයෙකි.

නීච ය.

නින්දිතය.

නිවටය.

නිහීන ය.

තුච්චය.

තුප්පහි ය.

පජාත ය.

අධම ය.

නරුම ය.

කුප්ප ය.

කුපාඩි ය.

බලු ය.

........

බුදුහාමුදුරුවන්ට ත් අපහාස කරන ගීතය..?

2012-02-10T08:50:00.000-08:00

මේ වූකලී බුදු දහමට එරෙහිව සිදුවන අපහාස සම්බන්ධයෙන් සමස්ත ලෝකවාසී බෞද්ධ ජනතාවම අවදියෙන් සිටිය යුතු කාලයකි.

අවදියෙන් සිටීමේ ප්‍රතිඵලයක් වශයෙන් 'ටිකෙන් ටික' නම් එවන් ගීතයක් පසුගියදා අතටම මාට්ටු විය.

මටද එකක් මාට්ටු විය.

නවදැලි හේනක පෑව වැඳිරි රුව

ලෙස උවමින් දෙනුවන් රවටා

මා පෙම් කළ ජනපද කල්‍යාණිට

හිමියනි මට කළ නොහැක නිගා..

රැවටිලි සිදු කරන්නේ රැවටිලිකාරයෝය.

නන්ද කුමාරයාට මුවා වී සෝමතිලක ජයමහ නම් මේ අන්‍යාගමික කුමන්ත්‍රණකරුවා 'රැවටිලිකාරයා' යැයි අපහාස කරන්නේ බුදුහාමුදුරුවන්ටය.

බුදු දහමේ චිර ජීවනය උදෙසා හෙට අනිද්දාම මේ පිළිබඳව පැමිණිල්ලක් දැමීමට කටයුතු කරන බව මගේ මිතුරු ගුණසිරියා කීවේය.

කිරිබත්ගොඩ ඥාණා VS මී මැස්සා

2012-02-06T09:28:00.000-08:00

මම අහිංසක මී මැස්සෙක් මි.

අපි මී පැණි හදන්නට බොහෝ වෙහෙස මහන්සි උවත් ඒවා එක්කෝ වලහා කඩා ගනී.නැත්නම් මිනිස්සු කඩා ගනී.

පැණි ටිකට කෙළියාට කමක් නැත.ඒකට අපි පුරුදු වෙලාය.

කිරිබත්ගොඩ ඥාණා නම් කළ්‍යාණ මිත්‍ර බුදු ෆිට් එක දැන් ටික කලක සිට මල් ටිකට ද කෙළිනවාය.

සිවුරට විදලා දළය කඩා ගන්න එපා කියා මී මැසි ප්‍රස්ථා පිරුළක් ද තිබෙන නිසා දැන් අපි උන්වහන්සේ ගේ මෑණියන් ද ඇතුළුව හතර වලිගයම සිහිපත් කොට පින් අනුමෝදන් කරනවාය.

ස...ආ...ආ..ආ.....දුහ්.......! ස...ආ...ආ..ආ.....දුහ්.......!

කුවේණි ගේ රෝස පාට ජංගිය

2012-01-24T08:50:00.000-08:00

විජය කුමාරයා එන විට කුවේණිය සිටියේ කපු කැට කැටය.

ඉන් අදහස් වන්නේ අපට දියුණු සංස්කෘතියක් තිබුණු බවය.

කපු කැට්ටේ ඇඳුම් හදා ගන්නය.

ඇඳුම් හදා ගන්න පුළුවන් නම් ජංගියක් හදා ගන්නවා කියන එක සිම්පල් වැඩකි.

ඇඳුම් හදාගෙන , ජංගි මසා ගෙන අඳිනවා පමණක් නොව ඒවා රෝස පාටින් වර්ණ ගැන්වීමට පවා අපේ මුතුන් මිත්තන් දැන සිටියාය යන්න චිත්තරපටියකින් හෝ අනාවරණය වීම අපට මහත් ආඩම්බරයකි.

විජය කුවේණි හි අධ්‍යක්ෂවරයා දුලානි අනුරාධා ගේ කකුල් දෙකට යටින් කැමරාව අල්ලා ඉටු කරන්නේ අපගේ ඒ විචිත්‍රවත් ඉතිහාසය ප්‍රේක්ෂක චිත්ත සන්තානයන් කුළුගන්වමින් ප්‍රතිනිර්මාණය කිරීමේ යුග මෙහෙවරය.

ගැසුවේය..! කෑවේය..! ඉරුවේය..!

2011-11-11T09:28:00.001-08:00

ජනතා විමුක්ති පෙරමුණ 1971 දී සිරිමාවෝ බණ්ඩාරනායක ගේ රජයට එරෙහිව කැරැල්ලක් ගැසුවේය.කෑවේය.

1989 දී ප්‍රේමදාස රජයට එරෙහිව දෙවන කැරැල්ලත් ගැසුවේය.කෑවේය.

රනිල් ට එරෙහිව චන්ද්‍රිකා සමගත් මහින්ද සමගත් ගිවිසුම් ගැසුවේය.කෑවේය.

මහින්ද ට එරෙහිව ෆොන්සේකා සමගත් රනිල් සමගත් ගිවිසුම් ගැසුවේය.කෑවේය.

තමන්ගෙම එකා වෙච්චි විමල්ට ගැසුවේය.කෑවේය.

ගහපු ගහපු සැරේට කාපු නිසා දැන් ගහන්න පණ නැත....!

කැරලිකාර කණ්ඩායම වෙනම පෝස්ටරයක් ගැසුවේය.ජවිපෙ එය ඉරුවේය.

(ඡායාරූපය lankaposter වෙබ් අඩවියෙනි)

ජවිපෙ ගයන විරිඳු සුරල්

2011-11-06T13:21:00.000-08:00

කුමාර් පාර්ශවයේ විරිඳුව

(ගායනය කුමාර් ගුණරත්නම් ඕපාත,පුබුදු,චමීර,වරුණ ඇතුළු පිරිස)

බේර ගන්ට පුළුවන් නම් රජ දරුවන් හට ඔටුන්න
සූදානම් මහතුනි උන් පරයි එක්ක නිදි වදින්ට

රජ පුටුවේ මළත් සැපයි...!

සෝමවංශ පාර්ශවයේ විරිඳුව

(ගායනය සෝමවංශ අමරසිංහ ටිල්වින්,අනුර,ලාල්කාන්ත ඇතුළු පිරිස)

කට වටකර වැට බඳින්න කැති මන්නා ගන්ට වෙනව

වැටට උඩින් පනින උන්ට මන්න පාර දෙන්ට වෙනව

සාධාරණ පහර දීම...!

රන්ජන් රාමනායක සහ අයිසෙක් නිව්ටන්

2011-10-30T12:06:00.000-07:00

පාර්ලිමේන්තු මන්ත්‍රී රන්ජන් රාමනායකට මැතිතුමාට ස්ත්‍රී වර්ගයා පිළිබඳව ඇත්තේ පුදුමාකාර කැක්කුමකි.සරල ව කියතොත් කැසිල්ලකි.

ඇතැමුන් සිතුවේ ඡන්ද ගුණ්ඩුවක් වශයෙන් ඔහු මේ ස්ත්‍රී කැක්කුම භාවිතා කරන බවයි.

නමුත් පසුගිය දවසක රන් වෑහෙන නාලිකාවට පැමිණ ඒ සියලු දුර්මත බිඳ හෙළා තමන් ගේ පරම,පවිත්‍ර,අව්‍යාජ,නිර්මල හා ශට මුක්ත ස්ත්‍රී කැක්කුම ඔප්පු කර පෙන්වීමට එතුමා සමත් විය.

එයට අදාල වීඩියෝව,

එදා අයිසෙක් නිව්ටන් ඇපල් ගසක් වෙනුවට පොල් ගහක් හෝ කොස් ගහක් යටට ගියේ නම් අද ගුරුත්වාකර්ෂණය කියා දෙයක් නැත.

මෙදා රන්ජන් තට්ටු තුනක් වෙනුවට තට්ටු දහයක හෝ විසි පහක ගොඩනැගිල්ලක ට ගියේ නම් අද රත්නපුර දිස්ත්‍රික් ජනතාවට පාර්ලිමේන්තු මන්ත්‍රී කෙනෙක් නැත.

ගඩාෆි නම් රේස් අශ්වයාගේ සුරංගනා කතාව

2011-10-26T05:47:00.000-07:00

ඔන්න එකෝමත් එක කාලෙක හයි....යෙන් දුවන්න පුළුවන් ගඩාෆි කියල රේස් අශ්වයෙක් හිටියා.

මෙයාට අයිතිකාරයෝ ගොඩාක් හිටියා.ඒත් අන්තිම කාලේ අයිති වෙලා තිබුනෙ ඔබාමා,සාර්කෝසි සහ කැමරන් කියලා හඳුන්වපු එක් කුසේ උපන් සහෝදරයෝ තුන් දෙනෙකුට.

ගඩාෆි ටිකක් විතර මුරණ්ඩුයි.ඒත් ගඩාෆි රේස් දුවලා දුවලා ගොඩාක් සල්ලි හම්බ කරලා දෙන නිසා සහෝදරයෝ තුන් දෙනා අවුරුදු හතළිස් දෙකක් යනකන් ගඩාෆි ට එක දඬුවමක් වත් දුන්නේ නෑ.ඔබාමා ලොකු අයිය නම් ඉඳල හිටලා චූටි තරවටුවක් කළා.

සල්ලි හොයලා දෙන නිසා ගඩාෆි ටත් එයාගේ පවුලේ අයටත් ගොඩාක් වාසි ලැබුණා.

ඒත් ඉතින් අපි හැමෝම වගේ ගඩාෆි ත් ටික ටික වයසට යන්න පටන් ගත්තා.එයාට ඉස්සර තරම් වේගෙන් දුවන්නත් බැරි උණා. ගඩාෆි ට කන්න බොන්න දෙන එකත් පාඩුයි කියලා සහෝදරයෝ තුන් දෙනාට තේරුණා.අනික ඒ කාලේ වෙනකොට ගඩාෆි ට වඩා හොඳට දුවන්න පුලුවන් අශ්වයො එයාලට හිටියා.තවත් ඉතින් ගඩාෆි ගෙන් වැඩක් නැහැ කියල හිතල එයාල ගඩාෆි ව මරල දැම්ම.

මේ කාලේ මුතු ඇටේ කියලා හඳුන්වපු බොහෝම ඈත පිහිටල තිබුණු රටක හරක් රංචුවක් හිටියා.ඒ රටේ මිනිස්සුත් හිටියා.හැබැයි වැඩිය හිටියේ හරක්.හරක් රංචුවේ හිටියා ගඩාෆි ගේ හොඳම රසිකයො ටිකක්.කොටින්ම මෙයාල හිතාගෙන හිටියෙ සහෝදරයෝ තුන් දෙනා ගඩාෆි ට දඬුවමක් වත් නොකරන්නේ ගඩාෆි ට තියන බය නිසා කියලා.

ඉතින් ගඩාෆි ව මරපු ආරංචිය අහපු ගමන් මෙයාල හොඳටම කලබල උනා.සමහරු අඬා වැළපුනා.සමහරු ආඩපාලි කිව්වා.තවත් සමහර අය සහෝදරයෝ තුන් දෙනා විනාශ කර දැමිය යුතුයි කියලා තර්ජනය කරන්නත් පටන් ගත්තා.

ඒ වෙලාවේ හිතට ආපු කේන්තියට එහෙම කිව්වට හරක් රංචුවකට එහෙම එකක් කරන්න බැරි බව එයාලට පස්සේ මතක් උනා....!!

ආදරණීය හිරුණිකා නඟා වෙත,

2011-10-23T00:26:00.000-07:00

දුමින්ද අයියා නඟා ගේ තාත්ති ව මහපාරේ මරලා දාන වෙලාවේ නඟා හිටියේ නිදාගෙනය.මේ රටේ නීතියක් කියලා දෙයක් ඇත්තටම නැහැ කියලා නින්දට යනකොටත් නඟා දැනගෙන හිටියේ නැතිය.

නඟා ඇහැරුනේ ඒ නරක ආරංචියත් එක්කය.නිදිමරගාතෙම ද මන්දා නීතිය,නීතියේ පාලනය,මනුස්සකම වගේ දේවල් ගැන කතා කරන්න පටන් ගත්තා මතක ඇතුවාට සැක නැත.

අම්මප නංගියෝ කවදා හරි දවසක චන්ද්‍රිකා ඇන්ටි,පබා අක්කි,රෝසි ආච්චි ම්..ම්..එතකොට අනර්කලි නංඟි වගේ අය මේ රටේ කරපු විප්ලවේ හා සමාන විප්ලවයක් ඔයත් කරන බව එතකොට මට ඉන්තේරුවෙන්ම තේරුනාය.

ඒත් නඟා ගේ ප්ලෑන් බී කතාව අහපු වෙලාවේ ඉඳලා නඟා ගෙයි මගෙයි හිතවත් කම දන්න ගමේ එවුන් ඒ කතාව මොකක්ද කියල අහලා නිතර කරදර කරනවාය.

http://www.youtube.com/watch?feature=player_embedded&v=TwEy_e_rdXM

නඟාට මේ වෙලාවෙ වැඩ වැඩි නම් හදිසියේ ලියුම් ලියන්නට කරදර වෙන්ට ඕනෑ නෑය.මගේ දැනුම් තේරුම් වල හැටියට උත්තරයක් ගලපා ගන්නට මට පුලුවන්ය.

නීතිය විසින් සාධාරණය ඉෂ්ට නොවුණොත් ප්ලෑන් බී එක ක්‍රියාත්මක කරනවා කියන්නේ නීතියට පිටින් දුමින්දට ගේම දෙනව කියන එක නේද මයෙ අම්ම..?

මෙයට,

නිතර ඔබේ දියුණුවම පතන,
ගුණසිරි අයියා.

ශිරාල් සහ බුද්ධික හෙවත් ගොන් බාන රැකගමු...!!

2011-10-14T11:31:00.000-07:00

සජිත් ප්‍රේමදාස යනු බාග දෙකක එකතුවකි.

එක බාගයක් සජිත් ගේ ය.අනිත් බාගේ ශිරාල් සහ බුද්ධික ඇතුළු වටේ ඉන්න ගෝල බාලයන්ගේ ය.

සජිත් ගේ බාගේ රනිල් ට පරාණ බය ය.

හැබැයි අනිත් බාගේ ගැන තියන විශ්වාසය නිසා සජිත් ගේ බාගේ තියන අඩුව කාටවත් පේන්නේ නැත.

ශිරාල් සහ බුද්ධික ඇතුළු අනිත් බාගෙත් රනිල් ට පරාණ බය ය.හැබැයි සජිත් ගෙ බාගේ ගැන තියන විශ්වාසය නිසා ඒ අඩුවත් කාටවත් පේන්නේ නැත.

යූ එන් පි ය කොළඹින් පරාජය කොට රනිල් එලවා දමා සජිත් නායකත්වයට ගෙන ඒමට දත කට මැදගෙන බලා සිටියේ සම්පූර්ණ එකක් තියා බාගයක් වත් නැති මෙවන් පුඟුලෝ ටිකකි.

සජිත් ගේ බාගේ ගැන විශ්වාස කොට දෙන්නා බෙල්ල තිබ්බේ දුවන කෝච්චියට ය.

දැන් අමාරුව සනීපය.ශිරාල් ට සහ මන්ද බුද්ධික ට එරෙහිව විනය පරීක්ෂණ කැඳවලා ය.

මේ ගොන් බාන රැක ගන්න කියා අද (14) සිරිකොත ඉදිරිපිට උද්ඝෝෂණයක් තිබූ බව රූපවාහිනී ප්‍රවෘත්ති වලට කීවේය.

සූ ගාලා විසි පහක් විතර එයට එක්වී සිටියේ ය....!!

වාද්දුවේ තැබෑරුම

2011-09-06T10:32:00.000-07:00

බුදු රජාණන් වහන්සේ අම්බපාලී නම් ගණිකාවගේ නිවසට වැඩම කොට ඇය දුන් දානය වලඳා ධර්ම දේශනා කළා විනා ඇගේ බඩ රස්සාවට කෙළින්න ගියේ නැත.

මාර දූවරුන්ගේ අනඟ රැඟුම් ඉවසා සිටියා මිස නටන්න එපා කීවේ නැත.

පන්සල අසලම පිහිටා තිබුණු චුන්ද කර්මාර පුත්‍රයාගේ සූකර ඝාතකාගාරය වසා දැමිය යුතුය කියා උද්ඝෝෂණ කළේ නැත.

රා බී මත් වුණු නාලාගිරියා දමනය කළා විනා ඌට රා පොවපු අය ගැන හොයන්න ගියේ ද නැත.

මොළේ කල්පනාව තියන වැදගත් මිනිස්සු ප්‍රශ්න වලදී හැසිරෙන්නේ එහෙම ය.

නමුත් වාද්දූව නගරයේ විවෘත කිරීමට යෝජිත සුරා සැලක් පිළිබඳව සමස්ත ලංකා ශාසනාරක්ෂක මොන්ටිසෝරිය විරුද්ධ ය.

සුරා සැලක් වැසීමෙන් ශාසනය රැකිය හැකි නම් පය බරවාය පිටිකර බෙහෙත් බැඳීමෙන් ද සුව කළ හැකි විය යුතුය.

'ගාමනි' හෙවත් සරත් ගේ ලෝකය..

2011-09-02T16:49:00.000-07:00

‘ගාමනි’ යනු බලන්න වියදම් කළ මුදල් වලින් කාක්කන්ට ආප්ප අරන් දෙන්න හිතෙන අන්දමේ අග්‍රගණ්‍ය සිනමා නිර්මාණයකි.

චිත්‍රපටයේ ප්‍රධාන චරිත ලෙස ගුරුවරියක් හා හමුදා නිලධාරියෙකු සිටින අතර ඔවුන් දෙදෙනාට අමතරව බෞද්ධ භික්ෂුවක්,ජාතික ඇඳුම අඳින සිංහල ගුරුවරයෙක් සහ අහිංසක ගැමියන් පිරිසක් ආදී වශයෙන් පරිකල්පනීය ගමක සිටිය යුතු සෑම චරිතයක්ම පාහේ එහි ඇත.

කියන්න තරම් කරදරයක් මිනිස්සුන්ට නැත.නමුත් කොටි ත්‍රස්තවාදීන් නිසා හොඳට තිබුණු ගමේ සාමය බිඳ වැටේ.අවසානයේ දී ගමේ අය එක් වී ත්‍රස්තයන්ගෙන් ගම බේරා ගනී.

සුලෝචනා වීරසේකර නම් ගුරුවරිය අධ්‍යක්ෂ සරත් වීරසේකර වාගේම ය.සරත් ට මෙන්ම ඇයට ද රාජකාරියට අමතරව තව බොහෝ දේවල් කිරීමට කාලය ඇත.හමුදා නිලධාරීන්ගේ පෞද්ගලික තොරතුරු සොයා බැලීම,ගම ආරක්ෂා කරන ආකාරය පිළිබඳව හමුදාවට උපදෙස් ලබා දීම,ග්‍රාමාරක්ෂකයන් ට ඉතිහාසය කියා දීම ඒ අතරින් කිහිපයක් පමණි.

මේජර් විකුම් නම් හමුදා නිළධාරියාට අනුව ග්‍රාමරක්ෂකයන්ට නිළ ඇඳුමක් ලබා දී හොඳ පුහුණුවක් ලබා දුන් විට සමාජ පිළිගැනීමක් ලැබෙනවා ය.

දවල්ට සරම අඳින , රෑට ත්‍රී ක්වාටර් වර්ගයේ කොට කලිසමක් අඳින දේශීය සටන් ශිල්පියා රිටිගල සිට පැමිණි බව කියන නිසා දෝ මහසෝනා වාගෙමය.එක කාමරයක නිදා ගෙන සිටි නමුත් ක්ෂණයකින් තවත් තැනක ප්‍රාදූර්භූත වෙන්නට ඔහුට හැකියාව ඇත.ඔහු තම කොන්ඩ ගැටේ ලිහාගෙන සටන ට එනතෙක් ඉවසන්නට තරම් කොටි ඉවසිලිවන්තය.

චිත්‍රපටයට අනුව අසූ තුනේ දී අහිංසක දෙමළ වැසියන් කපා කොටා ඝාතනය කළේ සිංහල බෞද්ධයන් නොව ත්‍රස්තවදීන් කියා හඳුන්වන වෙනම පිරිසකි.

අසැබි දසුන් ඇතුලත් චිත්‍රපට සිංහල බෞද්ධ කමට නොගැළපෙන හෙයින් කුණුහරුප දෘශ්‍ය ගෝචර නොව ශ්‍රව්‍ය ගෝචර වන ආකාරයට ඉදිරිපත් කොට ඇත.

එනිසා පවුලේ සැමට එකට සිට නැරඹීමට ද හැක.

සෝමක්කත් රත්තරං ආනන්දත් රත්තරං..!

2011-08-21T11:24:00.000-07:00

රත්තරන් පුරවා ගෙන සිටින ගාල්තැන්න දේවාලයේ ආනන්ද දේවගැති තුමා සෝමක්කා ගේ රන් වෑහෙන නාලිකාවට පැමිණ මසුරන් කතාවක් කීවේය.

ඒ අනුව සමහර අවස්ථාවල දී ශ්‍රී භද්‍රකාලී මෑණියෝ ඔහුට රත්තරන් මවා දී ඇත.

දැන් ඉතින් ආනන්දට කියා ඇති තරම් රත්තරන් මවා ගෙන බිස්නස් කළ හැකි නිසා සෝමක්කා ගොඩය.

පිහිට ලබා ගැනීමට බලාපොරොත්තු වන අය සෝමක්කා ගේ කඩයෙන් රත්තරන් අරගෙන ගාල්තැන්න දේවාලයට පූජා කරන නිසා ආනන්දත් ගොඩය.

දෙන්නාම හරි හරියට සමාජ සේවය කරන නිසා සෝමක්කයි ආනන්දයි ගොඩ ගියොත් දෙයියන්නේ පිහිටෙං අපිත් ගොඩය.

කඩුව අතට ගත් සජිත් ගේ වඳුරු මිතුරා

2011-08-18T10:17:00.000-07:00

කිසියම් පුද්ගලයෙකුගේ ලිංගික ජීවිතය තීරණය වන්නේ ඔහුගේ හෝ ඇයගේ අභිමතය හා රුචිය අනුවය.කෙනෙක් ගත කරන ලිංගික ජීවිතය ඔහුගේ හෝ ඇයගේ පෞරුෂය හෝ නිර්මාණ ශක්තිය කෙරෙහි තිරණාත්මක බලපෑමක් ඇති නොකරයි.

මහා ඇලෙක්සැන්ඩර් අධිරාජයා ද සමලිංගිකයෙකි.නමුත් විශාල අධිරජ්‍යයයක් ගොඩ නැංවීමට ඔහුගේ සමලිංගිකත්වය බාධාවක් නොවීය.

සමහර අය මතු පිටින් ප්‍රතික්ෂේප කරන බොහෝ දේවල් වලට හිත යටින් බොහෝ කැමතිය.

සජිත් ගේ ඇම්බැට්ට ලාල් පෙරේරා ද එවැන්නෙකි.

ඔහුට රනිල් සමඟ ඇත්තේ දේශපාලනික ගැටළුවක් නොව වෙනත් එකකි.

දේශපාලනික කරුණු මතු කළ යුතු අවස්ථාවක දී ද තම ඊර්ෂ්‍යාවට ලක්වන රනිල් ගේ ලිංගික ජීවිතය ඔහුට සිහිවන්නේ එබැවිනි.

මෙය වූකලී මෝඩකම හා අශිෂ්ට කම විනා දේශපාලනය නොවේ.

සජිත් යූ.එන්.පි යේ නායකයා වන්නට සටන් කරන්නේ මෙවන් පිරිසක් වටකරගෙනය.

පුංචි උනත් හරිම සැරයි ජෝති ගේ නංගී

2011-08-15T11:20:00.000-07:00

සුරේන්ද්‍ර පෙරේරා නම් ගායකයා විසින් ජෝති ගී ඇතුලත් සංයුක්ත තැටියක් නිකුත් කිරීම සම්බන්ධව රසඳුන නම් පුවත් පත් අතිරේකයකට සම්මුඛ සාකච්ඡාවක් ලබා දෙමින් එච්.ආර් ජෝතිපාලයන් ගේ නැගණිය මාරම ටෝක්ස් ටිකක් දී තිබුනේ ය.

ඇය සඳහන් කරන අන්දමට ජෝති ගේ රසිකයන් මේ නිසා සිටින්නේ බලවත් කලකිරීමෙන් හා කේන්තියෙනි.ඔවුන් ඉදිරියේදී ගන්නට යන ක්‍රියා මාර්ගය ඇයට සිතා ගැනීමට වත් නොහැකි තරම් බරපතල එකකි.ඔවුන් විසින් පවත්වන්නට යෙදුනු උද්ඝෝෂණ,උපවාස පවා නතර කොට ඇත්තේ ජෝති ගේ පවුලේ අයගේ මැදිහත් වීමෙනි.

මෙය කියවූ මගේ මිතුරු ගුණසිරියා ගේ සර්වාංගයම කිළිපොලා ගොස් ප්‍රථමයෙන් මහත් ප්‍රීතියක් ද දෙවනුව මහත් ශෝකයක් ද ඇති වූ බව කීවේය.

අපේ රටේ මිනිසුන් මෙවන් කරුණකදී හෝ එක් වී අසාධාරණයට එරෙහිව නැඟි සිටීමට තීරණය කිරීම උගේ ප්‍රිතියට ද තම තනු නිර්මාණ වලට සිංහල වචන දමා ගායනා කිරීම එදා සිටි ඉන්දියානු සංගිතවේදීන්ගේ විරෝධයට හේතු වූයේ නම් ජෝති ට අත්වන්නට තිබූ ඉරණම උගේ ශෝකයට ද හේතු වී ඇත

සෝභිතට ගහද්දි ඇයි හඩ්සන් අඬන්නේ....?

2011-08-13T10:36:00.000-07:00

අපේ රට හරිම අරුම පුදුම එකකි.සෑම කරුණකදී ම පාහේ අල්ලා ගන්නේ ප්‍රශ්නයේ වැරදි කොණෙනි.

ලංකාවේ සංඝ සමාජය අන්ත දූෂිත,කුණු වී ගඳ ගසන පල් වතුර වලකි.

බුද්ධ පුත්‍රයන් යැයි කියා ගන්නා පල් හොරු බුදුන් වහන්සේ කරන්නට එපා කියූ දේවල්ම කරති.

ගුරුකම් කරති,නැකැත් බලති,දේශපාලනය කරති,ලිංගික ඇසුර සොයති,අරක්කු සිගරට් ගංජා ආදිය බොති...තව මෙකී නොකී දෑ රැසකි.

නෙත් එෆ්.එම් ගුවන් විදුලි නාලිකාව නිසා රුවන්වැල්ලේ සෝභිත නම් එවන් දුශ්ශීල භික්ෂුවකගේ සිවුර ගැලවිණි.

එවන් භික්ෂුවක ගේ නිරුවත හෙළි කිරීමට අනුගමනය කළ උපාය මාර්ගය සදාචාර සම්පන්න නොවන නිසා නෙත් නාලිකාව ට සීල් තැබිය යුතු බව ගුවන් විහිළු සංස්ථාවේ හඩ්සන් ලොක්කා කියයි.

මස් රස නිසා කෑවාට කමක් නැත.සත්තු මැරුවොත් පව්ය.

http://soundcloud.com/user9239558/hadson-samarasinghe-vs-neth-fm

අපේ මාමා සහ ඉන්දියාවේ ආශා...!!

2011-08-12T01:35:00.000-07:00

අපේ මාමා දොස්තර කෙනෙකි.ආශා බෝස්ලේ ගායිකාවකි.

මාමා අපේ අම්මා ගේ පවුලට ම ආඩම්බරයක් ය.ආශා ඉන්දියාවට ම ආඩම්බරයක් ය.

මාමා අපේ ගෙදරට එන්නේ එහෙමත් වෙලාවකය.ආශා ලංකාවට එන්නේ ද එහෙමත් වෙලාවකය

මාමා එනතෙක් පාරට වී බලා සිටින්නට කියා අපට නියෝග ලැබේ.ආශා එනතෙක් පාරට වී බලා සිටින්නට කියා අයි.ටී.එන් එකේ අයට නියෝග ලැබේ.

මාමා ගේ නම කිව්වම මුළු ලංකාවම දන්නවා ඇති කියලා අපේ අම්මා හිතාගෙන ඉන්නවාය.අශා කිව්වාම මුළු ලෝකෙම දන්නවා ඇති කියලා ලංකාවේ සමහරු හිතාගෙන ඉන්නවා ය.

මාමා අපිට පොරක් උනාට උන්ට පොරක් නොවේය කියා අල්ලපු ගෙදර ගුණසිරි කීවේය.ආශා ද ඒ තරම් පොරක් නොවන බව සමහරු කියති.උන් ඔක්කොම ඊර්ශ්‍යාකාරයෝ ය.

සූරියප්පෙරුම special....!!

2011-08-11T02:10:00.000-07:00

නාථ දෙවියන් විසින් හාල් වල ආසනික් සොයා ගැනීම තරම්ම වැදගත් සොයා ගැනීමක් පසු ගිය දවසක මහා දාර්ශනික ජේ .ආර් .පී සූරියපෙරුමයන් විසින් සිදු කොට ඇති බව වාර්තා වෙනවා.

පසු ගිය දිනෙක දොර මඬලාව නම් වැඩසටහනකට සහභාගී වෙමින් ඒ මහතා ප්‍රකාශ කර සිටියේ දරුවන් සෑදීමේ ශක්‍යතාවක් නොමැති පුද්ගලයෙකුට ලංකාවේ ජනාධිපති, අගමැති වැනි තනතුරක් ලබා නොදිය යුතු බවයි.

දරුවන් හැදීම සහ රට පාලනය යන කාර්යයන් ද්වයම එකම ඉන්ද්‍රියකින් කල හැකි බව අනාවරණය කළ ඒ මහතාට අපගේ ගෞරවණීය ප්‍රණාමය මේ මොහොතේ දී පුද කර සිටිනවා.